Мицкоски: Ситуацијата со пожарите ќе се стави под контрола, пристигна помош од Турција
Претседателот на Владата на Република Северна Македонија, Христијан Мицкоски, одговарајќи на новинарско прашање при посетата на Општина Охрид, во врска со пожарите во земјата изјави дека следните два дена ситуацијата ќе биде целосно под контрола и во моментот помош е пристигната од Турција, а се чека и од Србија, Црна Гора и Словенија.
„За разлика од претходната влада и како до сега кога кога користеле алтернативни методи на повикување дожд и слично за да се справат со пожарите, сега оваа Влада веднаш по доаѓањето, видовте, двајцата министри се упатија веднаш на самото место заедно со директорот на ЦУК, Ангелов, да работат на смирување на огнената стихија. Веднаш побаравме и дел од таа поддршка е пристигната, од Турција се пристигнати два авиона и еден хеликоптер“, истакна премиерот Мицкоски.
Премиерот Мицкоски посочи дека авионите веќе работат на смирување на огнената стихија во атарот на општина Ново Село, а хеликоптерот сега се упатува во неготинскиот крај на планината Серта.
„Бидејќи станува збор за непристапни региони, во моментот друга поддршка, освен авионска, не е потребна. Очекуваме помош и поддршка од Србија, Црна Гора, Словенија и цениме дека следните два дена пожарот ќе биде ставен под контрола. Да бидат спокојни граѓаните, ја контролираме целосно ситуацијата, денеска имаме засилување со авиони, кои ќе може, особено во Ново Село, да црпат ресурси, вода од Дојранското Езеро. Имаме план, во текот на утрешниот ден и задутре работата ќе биде целосно под контрола“, изјави Мицкоски.