„Златна треска“: Германците најавуваат ископ на литиум во Алтенберг
Во Алтенберг во Рудните Планини во Саксонија, Германија е најавено ископување литиум.
Најтиражниот и најчитаниот германски весник „Билд“ пишува дека наскоро рударите повторно би можеле да ја испеат рударската народна песна „Steigerlied“ бидејќи германската рударска компанија Zinnwald Lithium GmbH сака да изгради рудник за литиум под земја, што би значело заживување на оваа област и отворањето на нови работни места.
До 2030 година, Европската унија сака да покрие десетина од своите потреби за стратешки суровини од сопственото производство, вклучувајќи го и литиумот, кој е итно потребен за енергетската транзиција.
Резервите на литиум во овој дел на Германија се поголеми од очекуваното.
Споменатата рударска компанија ги истражуваше претходните две години и дојде до заклучок дека наместо 125.000 тони литиум, колку што мислеа дека има, количините всушност се проценуваат на 429.000 тони, изјави извршниот директор Марко Ухлиг за Билд.
Компанијата сака да произведува до 18.000 тони литиум хидроксид годишно – доволно за околу 800.000 електрични автомобили.
– На овој начин даваме и важен придонес за транзицијата на енергијата и мобилноста, како и за заштитата на климата – вели Ухлиг и додава дека планот е ископувањето да започне на крајот на деценијата.