ПРОСЕЧНАТА ПЛАТА НЕДОВОЛНА ЗА ПРОСЕЧЕН ЖИВОТ
Просечната нето-плата по вработен во август 2024 година бележи мало зголемување на 41.097 денари, што е за само 136 денари повисоко од платата исплатена во јули. Иако оваа просечна плата е повисока за 12,9% во споредба со истиот месец минатата година, таа продолжува да падне во однос на јуни, кога просечната плата изнесуваше 41.939 денари. Во јули, просечната плата падна за илјада денари на 40.961 денар, а во август забележа незначително зголемување во однос на јули. Всушност, просечната плата за август е под нивото од мај, кога таа изнесуваше 41.252 денари, и е слична со платата во април, која изнесуваше 41.085 денари.
Во контекст на растечките трошоци на живот, особено за основните производи, ова зголемување на платата не е доволно да ги покрие потребите на граѓаните. Заедно со прогнозата на Светска банка дека македонската економија ќе порасне за само 1,8% оваа година, што е најниско во регионот, создава загриженост за општата кондиција на македонското стопанство.
Според податоците на Државниот завод за статистика, минималното зголемување на просечната плата во однос на јули е забележано во неколку сектори: уметност, забава и рекреација (5,3%), земјоделство, шумарство и рибарство (4,2%), и објекти за сместување и сервисни дејности со храна (3,2%). Ова укажува на нерамномерниот развој на платите во различни индустрии, што дополнително ја комплицира сликата на македонската економија. Просечната бруто-плата, пак, во август годинава изнесува 61.806 денари, но и таа бројка не може да прикрие загриженоста за намалувањето на куповната моќ на граѓаните.