Ветерот наш, ветерниците странски, чија е струјата?

Најголем обновлив извор на енергија треба да биде ветерен парк што ќе го гради инвестицискиот фонд „Алказар енерџи“ со седиште во Луксембург. Првите киловати се очекуваат во 2027 година. Од Министерството за енергетика велат дека се бара модел – кој дел од струјата произведена од приватни обновливи извори на енергија би останал во државата. Експертите се едногласни дека зелената транзиција мора да се случува и потсетуваат дека набргу ќе мораме да плаќаме и такса за јаглерод диоксид. Во енергетиката ќе има и нова регулатива

Производството на електрична енергија од ветерници учествува со скромни осум проценти во вкупното производство на обновливи извори на енергија. Енергетичарите се согласуваат дека во Македонија може да се постават повеќе ветерници. Но, прашањето што ја мачи јавноста е кој ќе ги постави тие ветерници, дали економијата и граѓаните ќе имаат бенефит ако производителите се странски компании што го користат нашиот ветер, а струјата си ја продаваат на берза, и дали е време да се размислува за државни обновливи извори на енергија со кои самите постепено ќе го замениме производството од термоелектраните.

Неодамна во фокусот на вниманието беше веста дека инвестицискиот фонд „Алказар енерџи“ со седиште во Луксембург ќе гради 55 ветерници кај нас. Ова беше првата инвестиција што ја обелодени Христијан Мицкоски по седнувањето на премиерското столче. Оттогаш во јавноста нема дополнителни информации како напредува тој проект, останува ли во фокусот на инвестицискиот фонд од Луксембург, но дали има и некој детаљ плус што го испреговарала Владата, во однос на производството и пласманот на струјата.

„Слободен печат“ разговараше со Министерството за енергетика и побара посвежи информации. За разлика од првичните најави дека ветерниот парк ќе почне да се гради во 2026 година, веста е дека изградбата ќе почне порано.


1331

Задолжително

Verified by MonsterInsights