SAP SE стана највредна компанија во Европа
Германската компанија SAP SE стана највредната јавна компанија во Европа, преземајќи ја таа титула од данскиот производител на лекови за слабеење Novo Nordisk A/S.
Акциите на SAP во понеделникот пораснаа за 1,6%, со што пазарната вредност на компанијата достигна околу 314 милијарди евра (340 милијарди долари).
Истовремено, вредноста на Novo Nordisk оваа година падна за 16%, поради разочарувачките резултати од клиничките испитувања на нивната нова инјекција за слабеење CagriSema, пренесува Bloomberg.
Акциите на SAP во последната година се зголемија за 42%, поттикнати од забрзаното преминување на клиентите од традиционални сервери кон облачната инфраструктура.
Оваа транзиција ѝ овозможи на компанијата да продава поскапи производи со вградени функции на вештачка интелигенција, што дополнително го забрза растот на приходите.
Аналитичарите проценуваат дека продажбата на SAP ќе порасне за 12% оваа година, што би бил најбрзиот годишен раст на компанијата во последните десет години. Се очекува уште побрз раст на оперативниот профит, благодарение на реструктурирањето најавено во јануари 2024 година.
За разлика од германската SAP, другите водечки европски компании се соочуваат со предизвици.
На пример, ASML Holding NV трпи последици од намалените нарачки на клучните клиенти и сè построгите ограничувања за извоз на опрема за производство на чипови во Кина.