Македонија и Обединетото Кралство потпишаа историски договор за стратешко партнерство
Премиерот на Северна Македонија, Христијан Мицкоски, на Самитот на Европската политичка заедница во Тирана постигна историски договор за стратешко партнерство со Обединетото Кралство. По средбата со британскиот премиер Кир Стармер, Мицкоски соопшти дека договорот ќе овозможи инвестициски циклус вреден околу шест милијарди евра, насочен кон инфраструктурата, железницата, транспортот, здравството и други клучни сектори.
Овој договор ја позиционира Македонија меѓу приоритетите на една од најголемите светски сили и отвора нови перспективи за економска и политичка соработка. Мицкоски го нарече договорот „голем, неповратен чекор напред“ кој ќе ја зацврсти билатералната соработка и ќе донесе британска експертиза и финансиска поддршка за реформи.
Премиерот истакна дека Македонија ќе продолжи да се посветува на евроинтеграциите и дека иднината на македонските граѓани е во Европската унија. Договорот, кој беше резултат на повеќемесечни преговори, ќе придонесе за стабилност и развој, како и за поцврсти политички врски и координација во справувањето со глобалните безбедносни предизвици.
Британскиот премиер Стармер истакна дека договорот е од голема важност и дека со него ќе се решаваат многу важни прашања меѓу двете држави, изразувајќи надеж за плодна и долгорочна соработка. Македонија и Обединетото Кралство ќе работат заедно на економски развој, безбедност и регионална стабилност, што ја прави оваа соработка клучна за иднината на земјата.