Ветерен Парк Богданци со нови 15 MW – потпишани договори вредни 37,6 милиони евра
Проектот за проширување на Ветерниот Парк Богданци влегува во завршна фаза со потпишување договори помеѓу АД ЕСМ и Siemens Gamesa Renewable Energy (SGRE). Со оваа инвестиција од 37,6 милиони евра, ќе се изградат уште четири ветерни турбини со вкупен капацитет од 15 MW и очекувано годишно производство од 46 GWh – доволно за потребите на околу 6.000 домаќинства.
Финансиската конструкција вклучува поволен заем од германската KfW банка (25,7 милиони евра), грант од Европската Унија преку WBIF (8,9 милиони евра) и сопствени средства на ЕСМ (3 милиони евра).
„Овој проект претставува моќен симбол за тоа што можеме да постигнеме преку стратешко партнерство, доверба и визија за позелена и поотпорна иднина,“ изјави Сања Божиновска, министерка за енергетика.
Германската амбасадорка Петра Дрекслер нагласи дека „проширувањето на ветерниот парк е уште една илустрација на континуираното силно партнерство помеѓу Германија, ЕУ и Северна Македонија за јаглеродно-неутрална иднина.“
Според генералниот директор на АД ЕСМ, Лазо Узунчев, подготвителните активности започнуваат ова лето, а финалната монтажа на турбините се очекува да заврши до летото 2027 година.
Овој проект ја зајакнува енергетската независност на државата и е клучен чекор кон одржлива и безбедна енергетска иднина.