Мицкоски открива нов план за ЕУ: Македонското знаме би се развиорело во Брисел на почетокот на 2027
Македонија би можела да стане дел од Европската Унија многу побрзо отколку што се очекуваше, но под специфични услови. Премиерот Христијан Мицкоски во вечерашното интервју на Канал 5 откри дека во Брисел сè погласно се дискутира за сценарио според кое земјава, заедно со Украина, Црна Гора и Албанија, би влегла во Унијата веќе на почетокот на 2027 година.
Македонија би седела на масата во Брисел, би учествувала во работата на Советот и комисиите, но нема да има право на глас во првата фаза.
Како што ќе се затвораат поглавјата, земјата ќе добива поголеми надлежности до целосно прилагодување на системот.
Ова сценарио е тесно поврзано со мировниот план за Украина и потребата за нејзина брза реконструкција и интеграција.
„Да седнеме на масата, да се развиори македонското знаме во Брисел… Ова е она што моментално се слуша како идеја по ходниците во Брисел, а беше тема и на Минхенската конференција“, изјави Мицкоски.