Силјановска Давкова: Власта никој не ја овластил да менува Устав, за тоа треба да се праша народот – ВМРО-ДПМНЕ бара она што пишува во фундаменталните документи на ЕУ, да важи и за нас

Македонскиот Устав за 30 години има 36 амандмани , а во 2023 година Владата предлага уште 3, нови. Овој факт беше посочен на вчерашната дебата што во организација на партијата ВМРО-ДПМНЕ се одржа во Охрид, а е дел од нивната кампања за средби со гражаните насловена „ВАЖНО Е! ОД ТЕБЕ ЗАВИСАТ ПРОМЕНИТЕ“.

Професорката Силјановска рече „Намерно ќе земам два примери околу честотата на уставните измени. Замислете Уставот на САД е донесен во 1787-та година и досега доживеал 27 амандмани. Инаку Уставот на САД има само седум члена. А, ние за 30 години имаме 36 амандмани и сега нели предложија уште 3 амандмани. Зошто ги зедов овие примери? Бидејќи двата Устави важат за цврсти Устави, демек постапката за нивната промена е тешка“, рече Силјановска Давкова.
Таа додаде дека најголемиот број на измените на македонскиот Устав не дошле од граѓаните, туку однадвор, а тоа во науката се вели како наметнато. „И повторно на дневен ред се такви амандмани. Немало во историјата Устав кој што уште само што бил донесен, нашиот Устав уште во 1992 година замислете ја доживеа првата измени и тоа повторно на барање однадвор. Што беше образложението? Дека ако напишеме во Уставот дека немаме територијални претензии кон соседите дека нема да имаме проблем и тоа го побара Бадентеровата комисија“, потсети таа.

Пратеничката посочи дека по амандманот во 1992 година, започнаа промените, за знаме, за Рамковниот договор, за Преспанскиот договор.

„Овие конфузни луѓе кои себеси си противречат ден за ден, како што гледаат граѓаните, не може да бидат државници. И тие не знаат што е национален интерес. А, Уставот ги изразува и ги штити националните интереси“, рече Силјановска Давкова коментирајќи ги владините функционери. „Можеме да влеземе во Европа со она различното што го имаме за да и го дадеме. Бидејќи ЕУ е единство на различности“, порача пратеничката.

Силјановска Давкова нагласи дека власта никој не ја овластил да менува Устав, за тоа треба да се праша народот. „Не може вие да правите пазар без мандат, без легитимитет, со нешто што припаѓа само и само на народот. А, тоа го прават овие луѓе од власта“, истакна Силјановска Давкова.

Таа посочи дека ако се прочитаат фундаменталните документи на кои се темели ЕУ ќе се забележи дека она што е најважно во нив не е организационата структура, па ни нормите, туку темелните вредности и принципи. „Ние само бараме тоа што е втемелено да важи и за нас“ вели професорката Силјановска, па го поставува прашањето „-Што бараме ние? Тоа е , нашиот идентитет да биде почитуван. Не бараме ние нешто невозможно“, порача пратеничката.

Инаку кампањата на ВМРО-ДПМНЕ „ВАЖНО Е ! ОД ТЕБЕ ЗАВИСАТ ПРОМЕНИТЕ“ е најнова на оваа политичка партија за средба со граѓаните во која освен што се предвидени теренски посети и дебати, партијата ќе ги претстави и своите принципи на владеење по кои ќе се води при преземањето на власта во Македонија.