Џеф Кабили одржа предавање на Меѓународниот Славјнски Универзитет

Меѓународниот Славјански Универзитет во Свети Николе беше домаќин на еден од најочекуваните универзитетски настани оваа година, на кој гостуваше Џеф Кабили, реномиран предавач од Stanford Continuing Studies. Предавањето под наслов “Nonverbal Communication: The Power of Body Language and Voice” го привлече вниманието на повеќе од 250 учесници, потврдувајќи го значењето на ефективната комуникација во денешно време.

Настанот го отвори проф. д-р Јордан Ѓорчев, претседател на Управен Одбор при Меѓународен Славјански Универзитет. Со ова предавање, Меѓународен Славјански Универзитет уште еднаш покажа дека е центар на знаење и образование каде што се промовираат вештини кои се клучни за успех во современото општество. Учесниците заминаа со нови знаења и техники кои ќе им помогнат да ги подобрат своите комуникациски вештини, особено во областа на невербалната комуникација.

Настанот, кој се одржа на 17 февруари со почеток во 12:00 часот, нудеше уникатна можност за сите присутни да учат од еден од најдобрите предавачи во светот на тема која станува сѐ поважна во секојдневната комуникација и професионалниот развој. Учесниците имаа шанса да влезат во интеракција со предавачот Кабили, искусен специјалист за невербална комуникација и уметност на говорење.

Џеф Кабили, кој порано работеше како директор за деловен развој во Stanford Graduate School of Business, има богато искуство во предавањето на ефективни невербални комуникациски вештини. Неговото предавање на Меѓународен Славјански Универзитет не само што ги збогати знаењата на студентите и младите професионалци, но и ги инспирираше сите присутни да ги применат научените техники во својата секојдневна комуникација и професионални ангажмани.

Настанот, кој беше одржан на англиски јазик, беше наменет за широк круг на учесници, и на него присуствуваа студенти кои се подготвуваат за интервјуа за работа, дипломирани студенти, основачи на стартапи, професионалци во продажба, јавни говорници, лидери, како и за професори и предавачи кои сакаат да ја подобрат својата комуникација.

На настанот присуствуваа и студенти од Универзитетот Аксарај од Турција, Великотрновскиот универзитет „Св. св. Кирил и Методиј“ од Велико Трново, Бугарија и Високата школа за безбедност и економика (ВУСИ) од Пловдив, Бугарија, како и Пол Финерти, Еразмус+ координатор во Atlas Language School – Даблин.


1080