Европските берзи со благ раст, еврото ослабе по трговинскиот договор САД–ЕУ
Главните европски берзи ја започнаа неделата со умерени добивки, додека еврото забележа благ пад во однос на американскиот долар, откако инвеститорите со умерено олеснување го пречекаа новиот трговски договор меѓу САД и Европската унија.
Индексот STOXX 600 порасна за 0,7%, додека еврото ослабе за 0,3% во однос на доларот, во почетокот на недела што може да биде клучна за трговските тензии предизвикани од американскиот претседател Доналд Трамп, јавува Reuters.
Берзанските индекси во Германија (DAX), Франција (CAC 40), Италија (FTSE MIB) и Шпанија (IBEX) се зголемија меѓу 0,4 и 0,8 проценти во првиот час на тргување. Во меѓувреме, фјучерсите на S&P 500 и Nasdaq најавуваат нови рекордни отворања на њујоршката берза, пишува Biznis.
Првично, еврото зајакна со отворањето на азиските пазари, но потоа ослабе поради глобалното јакнење на доларот. Приносите на државните обврзници од еврозоната, кои ја одразуваат цената на задолжување, исто така бележат благ пад. Приносот на германските десетгодишни обврзници, кои служат како референтна вредност за еврозоната, се намали за 0,5 базични поени, достигнувајќи 2,71%, по скокот што го забележа минатата недела откако ЕЦБ ги ублажи шпекулациите за брзо намалување на каматните стапки.
Азиските пазари под притисок
Во текот на ноќта, MSCI индексот на азиско-пацифички акции падна за 0,3%, додека јапонскиот Nikkei изгуби над 1%, откако минатата недела достигна едногодишен максимум. Австралискиот долар, кој често служи како индикатор за апетитот за ризик, се задржа на 0,657 долари, близу осуммесечниот максимум.
Содржина на договорот САД–ЕУ
Според прелиминарниот договор, кој претседателката на Европската комисија Урсула фон дер Лајен го опиша како „најдоброто што ЕУ можела да го добие“, се воведува царина од 15% на најголемиот дел од европскиот извоз, а ЕУ ќе инвестира 600 милијарди долари во САД и ќе отвори некои клучни делови од своето пазариште.
Другите големи економии, вклучувајќи ја и Кина, сè уште се обидуваат да постигнат свои договори пред истекот на рокот што го постави Трамп – 1 август. Според најавите, САД и Кина во понеделник ќе го продолжат своето трговско примирје за уште 90 дена, на состанок во Стокхолм. Договорот на ЕУ доаѓа веднаш по трговскиот договор кој минатата недела беше постигнат со Јапонија.