Еуфоријата околу вештачката интелигенција ги крие првите знаци на пукање
На Волстрит владее еуфорија, иако макроекономските показатели испраќаат сè послаби сигнали. Инфлацијата тврдоглаво останува над целта, невработеноста полека расте, а порастот на берзанските индекси се потпира на тесен круг технолошки гиганти. Дали навистина станува збор за нова ера на продуктивност предводена од вештачката интелигенција или пак за уште еден циклус што го чека својот катализатор за корекција?
Американската економија е во необичен раскорак. Од една страна, фискалната политика на Доналд Трамп и новите царини ги поттикнуваат инфлаторните притисоци, а инфлацијата упорно се задржува над целта од два процента што ја постави Федералните резерви. Од друга страна, пазарот на труд покажува јасни знаци на слабеење.
Гувернерот на ФЕД, Џером Пауел, предупреди дека ризиците за инфлацијата се нагоре, а ризиците за вработеноста надолу – комбинација која го прави контекстот исклучително предизвикувачки. Токму таквата состојба отвора страв од стагфлација, сценарио што со право ги држи будни централните банкари.