Роботиката ја освои сцената: Македонија ја отвори Глобалната недела на претприемништво 2025
Во рамките на Глобалната недела на претприемништво 2025, денес ќе се одржи свеченото отворање на манифестацијата „Роботика – иновации кои го трансформираат светот“, настан што го става во фокус најбрзорастечкиот технолошки сектор во светот.
На отворањето ќе присуствува Заменик-министерот за економија и труд, Марјан Ристески, кој ќе ја нагласи важноста на иновациите и новите технологии како двигатели на економскиот развој и конкурентноста.
Настанот е организиран од Агенцијата за иновации, научно-технолошки развој и претприемништво – ИНОВА, а ќе собере претприемачи, компании, институции, академска заедница и млади иноватори. Преку презентации, панел-дискусии и демонстрации на современи роботички решенија, ќе се потенцира значењето на роботиката во индустријата, здравството, образованието и секојдневниот живот.
Организаторите истакнуваат дека целта на манифестацијата е да се поттикне иновативниот дух, да се поврзат креативните умови и да се креираат нови можности за развој на домашната стартап-заедница.
Глобалната недела на претприемништво продолжува со низа настани низ државата, посветени на дигитализацијата, иновациите и иднината на работните места.