Стевче Стевановски е нов претседател на Советот за развој на Пелагонискиот плански регион.
На конститутивната седница во Битола, со едногласна поддршка од градоначалниците на сите девет општини, првиот човек на Општина Новаци го презеде мандатот од битолскиот градоначалник Тони Коњановски, кој претседаваше со седницата.
Советот донесе и две клучни одлуки:
• распишување Јавен повик за избор на претставник од здруженијата,
• започнување постапка за избор на претставник од бизнис-заедницата.
Со изборот на Стевановски, фокусот на Советот се очекува да остане на инфраструктура, регионална координација и економски развој, како и на поактивна поврзаност со приватниот сектор. Новиот претседател најавува транспарентна работа и поддршка на проекти со директна корист за жителите на Пелагонија.