Поставување на нови информативни табли во Пелистер за подигнување на еколошката свест
На Национален парк Пелистер започна поставувањето на нови информативни табли со современ дизајн, насочени кон подобра едукација и промоција на природните вредности на паркот. Првите табли се веќе поставени во најпосетената зона, а во наредниот период е најавено нивно проширување долж планинарските и велосипедските патеки.
Во фокусот на новиот визуелен и содржински концепт е петтоигличестиот бор – молика, познат и како македонски бор, кој претставува еден од најзначајните симболи на паркот. Овој ендемичен вид, научно познат како Pinus peuce, бил откриен на Баба Планина во 1839 година и речиси два века ја раскажува приказната за природното и културното наследство на регионот.
Новите инфо табли имаат за цел да го доближат значењето на моликата до посетителите, но и да ја истакнат пошироката улога на Пелистер како „жив музеј“ на богат биодиверзитет, историја и традиција. Преку современ пристап и визуелна привлечност, тие треба да придонесат кон подигнување на јавната свест за зачувување на природата, како и за зајакнување на врската помеѓу локалното население и природното богатство на овој заштитен простор.