Кичево доби нов телескоп за астрономска едукација и набљудување

Кичево добива нов телескоп, со кој ќе се создадат нови можности за астрономска едукација, јавни набљудувања и активности поврзани со науката и вселената.

Преку соработката со BRESSER и International Space Alliance (ISA), огранокот на ISA во Кичево доби телескоп BRESSER Messier AR-102L/1350, кој ќе биде ставен во функција за потребите на локалната заедница, особено на младите и љубителите на астрономијата.

Станува збор за ахроматски рефрактор со леќа од 102 милиметри и фокусна должина од 1.350 милиметри, со фокусен однос f/13.2. Опремата вклучува екваторијална монтажа EXOS-1, 6×30 оптички пронаоѓач, Hexafoc фокусер, адаптер за паметен телефон, соларен филтер и стабилен челичен статив.

Телескопот за првпат беше претставен пред заедницата на Крушино, во рамки на астрономска активност организирана во соработка со Извидничкиот одред „Мирко Милески“.

Настанот се одржа во симболичен момент за љубителите на астрономијата – на ден кога од Северна Македонија можеше да се набљудува делумно сончево затемнување, а во вечерните часови и метеорскиот дожд Персеиди.

Во активностите учествуваа волонтерката на Peace Corps North Macedonia Кејт Фаган и Наташа Спироска од International Space Alliance – Кичево, со поддршка од членовите на ISA USA Мартина Димоска и Боби Софронијоски.

Новата опрема ќе овозможи младите и граѓаните на Кичево непосредно да се запознаат со астрономијата, да набљудуваат небесни тела и преку практични активности да стекнуваат знаења од областа на науката, технологијата и вселената.

Од ISA упатуваат благодарност до BRESSER за поддршката и придонесот во мисијата за приближување на вселената до локалната заедница.

Кичево со новиот телескоп добива уште една можност – погледот кон иднината да започне со поглед кон ѕвездите.


1154

Задолжително

Verified by MonsterInsights