Австрија ја победи Полска со 3:1

Австриските фудбалери ја совладаа Полска со 3:1 (1:1) во натпреварот од 2. коло од групата Д на Европското првенство во Германија, што се одигра во петокот на Олимпискиот стадион во Берлин.

Австрија поведе веќе во 9. минута со голот на Гернот Траунер. Израмни за Полска Кшиштоф Пјатек во 30. минута. Кристоф Баумгартнер погоди за ново водство на Австрија во 67. минута. Конечните 3:1 ги постави Марко Арнаутовиќ во 78. минута од пенал.

И Полска и Австрија влегоа без бодови во дуелот на Олимпискиот стадион во Берлин, но со добар впечаток по загубените дуели со фаворизираните Холанѓани и Французи. Фактот дека во третото коло само ќе ги заменат ривалите од првото коло, им постави своевиден императив за победа на двете екипи, за да влезат со три бода во последните 90 минути од групната фаза.

За полските навивачи најважно беше прашањето дали и колку капитенот Роберт Левандовски ќе игра против Австрија. Веројатно беа разочарани кога го видоа стартниот тим без најдобриот стрелец на Полска.

Австријците беа поконкретни на почетокот на натпреварот, па веќе во 4. минута нивниот најдобар играч Марсел Забицер шутираше од шеснаесетникот, но не беше прецизен. Сепак, тимот предводен од Ралф Рангник поведе при втората шанса на натпреварот. Полјаците во 9. минута не успеаја да ја исчистат топката од сопствениот гол по игра со рака на левото крило. Филип Мвен доби топка и можност да нафрли во шеснаесетникот и одлично ја искористи. Ја испрати топката до висината на шеснаесетникот и до блискиот дирек. Таму австрискиот стопер Гернот Траунер беше највисок во скокот и со мало свртување со глава неодбранливо ја испрати топката во горниот агол покрај немоќниот Војчех Шчесни.

Полјаците во првите 15 минути тешко го освојуваа поседот, но беа опасни кога успеваа да организираат контранапади. Сепак, во завршницата им недостигаше конкретност. Сепак, во 30. минута со малку среќа Полска израмни. Акцијата на Полјаците беше долга, почна од десната страна, а Јан Беднарек стаса прв до топката на центаршут од лево крило, шутираше од десетина метри но директно кон Траунер кој одлично се позиционираше. Сепак, топката од австрискиот дефанзивец се одби директно во нозете на Кшиштоф Пјатек, кој од неколку метри го совлада австрискиот голман Патрик Пенц.

До крајот на полувремето Австријците се обидоа да постигнат уште еден гол, а Марсел Забицер беше постојана закана за Полјаците. Во 39. минута, полските одбранбени играчи успеаја да го блокираат неговиот удар, а во 42. минута неговиот проектил од 25 метри мина покрај стативата.

И двајцата тренери направија по една измена на почетокот на вториот дел, но потегот што го чекаа полските навивачи го направи Михал Пробиерц во 60. минута, кога го замени напаѓачкиот двоец и наместо Букса го внесе Роберт Левандовски. Сепак, Ралф Рангник ги подготви Австријците за полскиот капитен, кој не беше доминантен на овој меч. Паузата, сепак, си ја заврши работата.

Австријците продолжија да доминираат по посед, а тоа им се исплатеше во последните 25 минути игра. Изведоа одлична акција за ново водство во 67. минута. Александер Прас повлече по левото крило, а потоа испрати остра приземна топка до работ на шеснаесетникот. Австрискиот капитен Марко Арнаутовиќ ја пропушти топката низ нозе, а на неа налета Кристоф Баумгартнер и по првиот допир упати неодбранлив удар за 2:1.

Десет минути подоцна, на сличен начин Забицер набрзина продре низ одбраната на Полска во шеснаесетникот и излезе пред Шчесни. Го заобиколи, но полскиот голман го собори и изнуди пенал. Арнаутовиќ беше сигурен реализатор за 3-1 во 78. минута.

Австријците на многу сличен начин можеа да постигнат и четврти гол, но во 85. минута Конрад Лајмер, откако го заобиколи полскиот голман, ја испрати топката покрај стативата.

Австрија сосема заслужено победи и со три бода ја чека последната пресметка во групата во која за четири дена повторно на Олимпискиот стадион во Берлин игра против Холандија.


1097