Од пропадната текстилна фабрика до мултитрилионски инвестициски гигант

Легендата на Волстрит, Ворен Бафет, објави дека се повлекува од активното раководење со својата империја. Овој 94-годишен инвеститор, наречен „Пророкот од Омаха“, остави белег врз глобалната економија каков што малкумина го имаат направено – претворајќи ја пропаднатата текстилна компанија „Беркшир Хатавеј“ во инвестициски гигант вреден над 1,16 трилиони долари.

Од дете со весник во рака до милијардер со мисија

Роден во 1930 година во Небраска, Бафет покажувал деловен дух од најрана возраст. Од млади нозе ја изучувал вредноста на парите и инвестирањето, инспириран од книги и од својот татко, кој бил конгресмен и брокер.

По студиите на Универзитетот во Небраска и на Колумбискиот универзитет каде што учел кај познатиот Бенџамин Греам – таткото на „вредносното инвестирање“, Бафет го почнал својот инвестициски поход со неумолива дисциплина и аналитички пристап кој никогаш не излегол од мода.

Наследството што го остава зад себе

На годишниот собир на акционерите на „Беркшир Хатавеј“, Бафет официјално објави дека компанијата ќе премине во рацете на неговиот наследник, Грег Ајбл, кој веќе неколку години ја води енергетската дивизија на компанијата. „Грег е подготвен. Тој ќе продолжи таму каде што јас застанувам“, изјави Бафет пред илјадници акционери кои го наградија со аплауз.

Компанијата што тој ја водеше денес поседува над 60 реномирани бизниси, меѓу кои се Geico, Duracell, Dairy Queen, и значајни удели во Apple, Coca-Cola, Bank of America, и American Express. Неговата стратегија никогаш не се водела од краткорочни трендови, туку од вредности и долгорочен потенцијал.

Трогателен момент за Мангер

Бафет се присети и на својот најблизок пријател и соработник, Чарли Мангер, кој почина минатата година на 99-годишна возраст. „Му реков да стане жена, жените живеат подолго. Не прифати, но и така успеа да стигне речиси до сто“, се пошегува Бафет, оставајќи емотивна порака за човекот со кого го споделуваше своето финансиско патување повеќе од половина век.

Принципите што ја обликуваа ерата на Бафет

Покрај инвестициите, Бафет останува познат и по својата скромност и остар ум. Живее во истата куќа во Омаха од 1958 година, вози обичен автомобил и сака брза храна од McDonald’s. Неговите совети станаа библија за инвеститорите:

„Ако не најдеш начин да заработуваш додека спиеш, ќе работиш до крајот на животот.“
„Најдобрата инвестиција е вложувањето во себе.“
„Берзата е создадена за да го пренесе богатството од нетрпеливите кон трпеливите.“

Човек што мислеше и на иднината

Познат хуманитарец, Бафет веќе донираше преку 50 милијарди долари во добротворни цели и е коосновач на иницијативата The Giving Pledge, со која најбогатите луѓе во светот се обврзуваат да го донираат поголемиот дел од своето богатство.

Иако неговото повлекување значи крај на една ера, вредностите и визијата на Ворен Бафет ќе продолжат да живеат низ идните генерации инвеститори. Пророкот од Омаха заминува, но неговиот сенка ќе остане засекогаш врз светот на финансиите.


1219

Задолжително

Verified by MonsterInsights