Во Битола се одржа манифестацијата „Денови на Ростковски“
На 12 август 2025 година, во Битола се одржа традиционалната манифестација „Денови на Ростковски“, во организација на Регионалното здружение за македонско-руско пријателство „А.А. Ростковски“. Настанот е посветен на споменот и делото на рускиот императорски конзул Александар Аркадиевич Ростковски, кој трагично загина во Битола во 1903 година.
Церемонијата започна пред споменикот „Руски крст“, каде што свештеници од Преспанско-пелагониската епархија одржаа панихида. Во име на организаторот, присутните ги поздрави претседателот на Сојузот на здруженијата за македонско-руско пријателство, Драган Романски, а свое обраќање имаше и амбасадорот на Руската Федерација во Македонија, Сергеј Баздникин.
Амбасадорот Баздникин изрази благодарност до организаторите, нагласувајќи дека „Деновите на А.А. Ростковски“ се можност да се оддаде почит на дипломатот и да се потврди историското и духовно единство меѓу народите на Русија и Македонија. Тој потсети на улогата на Битола како „град на конзулите“ и значајно место за руската заедница, како и на придонесот на бројните Руси кои во различни периоди живееле и работеле во градот.
Драган Романски истакна дека споменикот „Руски крст“, подигнат во чест на конзулот, претставува трајно сведоштво за неговата пожртвуваност и поддршка на христијаните во Македонија во борбата за слобода. Манифестацијата, која од 2013 година се одржува секоја година, има цел да ја одржува традицијата на пријателство и заемна почит меѓу македонскиот и рускиот народ.
На церемонијата цвеќе положија амбасадорот Баздникин, руски сонародници, активисти на здруженијата на македонско-руско пријателство, претставници на политички партии и делегацијата на компанијата ЛУКОИЛ Македонија.
Споменикот „Руски крст“ е поставен во 2003 година, по повод 100-годишнината од убиството на Ростковски, кој служел како руски конзул во Битола од 1895 година. По одбележувањето, делегациите од здружението и амбасадата на Руската Федерација го посетија и манастирот „Свето Преображение Господово“ во селото Буково, каде што конзулот бил последен пат пред неговата смрт.







