ЈКП „Водовод“ – Битола со апел за рационално користење на водата и редовно подмирување на сметките
Поради зголемената потрошувачка на вода во летниот период, ЈКП „Водовод“ – Битола упати апел до сите граѓани и правни субјекти за рационално, одговорно и совесно користење на водата за пиење.
Од претпријатието посочуваат дека високите температури и зголемената потрошувачка во текот на летните месеци дополнително го оптоваруваат водоснабдителниот систем. Затоа, апелираат водата да се користи наменски и да се избегнува непотребното трошење, особено за активности кои не се од суштинско значење, со цел да се обезбеди стабилно и непречено водоснабдување за сите корисници.
„Секој поединец може да придонесе со одговорно однесување и внимателно користење на водата. Рационалната потрошувачка е во интерес на сите граѓани и претставува важен предуслов за сигурно функционирање на водоснабдителниот систем во периодите на најголема потрошувачка“, истакнуваат од ЈКП „Водовод“ – Битола.
Воедно, од претпријатието ги повикуваат сите корисници навремено да ги подмируваат своите обврски за потрошена вода. Редовното плаќање на сметките, нагласуваат, е неопходно за непречено функционирање на претпријатието, одржување на водоводната инфраструктура, реализација на тековните активности и обезбедување квалитетна услуга за сите потрошувачи.
Од ЈКП „Водовод“ – Битола потсетуваат дека неподмирените обврски можат да доведат до преземање мерки согласно законските прописи, поради што ги повикуваат граѓаните навремено да ги регулираат своите сметки и да избегнат дополнителни трошоци и санкции.
На крајот, од претпријатието упатуваат благодарност до сите совесни корисници кои со своето одговорно однесување придонесуваат за зачувување на водните ресурси и за сигурно, квалитетно и континуирано водоснабдување на Битола.