Битола одбележа 121 година од погубувањето на војводата Александар Турунџев

Битола денеска одбележа 121 година од погубувањето на Александар Турунџев, македонски револуционер и војвода, кој учествувал во македонското револуционерно движење и во Илинденското востание во 1903 година.

По повод годишнината, цвеќе беше положено пред споменикот на Турунџев кај „Ат Пазар“, како и на неговиот гроб во Светонеделските гробишта. Во име на Општина Битола, почит оддаде советникот Александар Јаневски, а пред споменикот и гробот се поклонија и граѓани, претставници на здруженија и членови на коњаницата „Костурска чета“ од Битола.

Турунџев потекнувал од Леринско и уште во младоста се приклучил кон револуционерното движење. Од четник подоцна станал војвода, а во текот на Илинденското востание учествувал во борбите во Леринско. По задушувањето на востанието продолжил со револуционерната активност, по што бил прогонуван од османлиските власти.

Во 1904 година бил заробен и доведен во Битола. По затворањето и судскиот процес бил осуден на смрт. Казната била извршена на 30 август 1905 година со јавно бесење на „Ат Пазар“.

Турунџев бил погребан на Светонеделските гробишта, а неговиот гроб со децении останува место каде што се оддава почит на неговиот живот и дело.

Минатата година, на местото каде што бил погубен, беше откриен споменик посветен на војводата. Со свечена церемонија и симболична поворка беше одбележан неговиот последен пат до местото на егзекуцијата.

Повеќе од еден век по неговата смрт, името на Александар Турунџев останува дел од историското паметење на Битола и Македонија. Неговата приказна сведочи за времето на Илинденското востание, за борбата, страдањата и жртвите на една генерација која оставила длабока трага во македонската историја.


1128

Задолжително

Verified by MonsterInsights