Почина Агарон Асатур, дипломатот кој остави длабоки траги во македонско-руското пријателство

Дипломатот остави значаен белег во македонско-руските односи, особено во културната, економската и граѓанската соработка

На 82-годишна возраст почина Агарон Николаевич Асатур, поранешен амбасадор на Руската Федерација во Република Македонија, соопшти Министерството за надворешни работи на Русија.

Асатур починал на 5 ноември 2026 година, а веста за неговата смрт беше објавена со изрази на длабоко жалење од раководството на руското Министерство за надворешни работи и Вториот европски департман.

Роден е на 27 февруари 1944 година во Ереван. Дипломирал на Институтот за ориентални јазици при Московскиот државен универзитет „М.В. Ломоносов“ во 1967 година, а една година подоцна ја започнал својата дипломатска кариера.

Во текот на повеќедецениската дипломатска служба, Асатур извршувал повеќе одговорни функции во руското Министерство за надворешни работи. Од 1994 до 1999 година бил вонреден и ополномоштен амбасадор на Руската Федерација во Република Маврициус, а од 2002 до 2006 година ја извршувал истата функција во Република Македонија.

Неговиот дипломатски мандат во Македонија беше одбележан со исклучително активен ангажман за унапредување на македонско-руските односи, не само на официјално дипломатско, туку и на културно, економско и општествено поле.

Асатур остваруваше интензивна соработка со македонските здруженија за македонско-руско пријателство, учествуваше на бројни културни, научни, економски и општествени манифестации и беше редовно присутен на настаните поврзани со традиционалното пријателство и соработката меѓу македонскиот и рускиот народ.

Неговата улога не се сведуваше само на присуство и поддршка на веќе организираните активности. Напротив, за многу настани и иницијативи самиот беше иницијатор и покренувач, вложувајќи личен ангажман во создавањето нови можности за поврзување и соработка меѓу двете земји.

Со својата непосредност, отвореност и посветеност, Асатур остави трајни траги во македонското општество и изгради искрени пријателства со голем број луѓе и организации во земјава. Неговото име ќе остане поврзано со еден период на активна промоција на македонско-руските врски, а многубројните пријатели што ги стекна во Македонија ќе го паметат како човек кој искрено веруваше во пријателството и соработката меѓу двата народа.

По пензионирањето во 2007 година, Асатур останал активен во организациите на ветераните на руската дипломатска служба. Од 2017 година ја извршувал функцијата претседател на Ревизорската комисија на Фондот за ветерани на дипломатската служба.

Во официјалното соопштение, руското Министерство за надворешни работи ги истакнува неговиот висок професионализам, трудољубивост, одговорност и внимателниот однос кон колегите.

„Светлата меморија на Агарон Николаевич засекогаш ќе остане во срцата на сите што го познаваа“, се наведува во изразеното сочувство до неговото семејство и пријателите.

Македонија се простува од дипломат кој не беше само претставник на една држава, туку и искрен пријател на македонскиот народ. Неговото дело, ангажманот и пријателствата што ги остави зад себе ќе продолжат да живеат во сеќавањата на сите што имаа можност да го запознаат и да соработуваат со него.


1134

Задолжително

Verified by MonsterInsights